അപ്രതീക്ഷിതം
അപ്രതീക്ഷിതം സുപ്രസന്നമീ സുപ്രസാദ സങ്കീര്ത്തനം
അപ്രമേയ നിന്നാത്മ ചൈതന്യമാകവേ ഭുവി പൂരിതം
സര്വ്വസാഗര മന്തരീക്ഷ ധ്യോവിലും ക്ഷീര പഥത്തിലും
സത്യമാനന്ദ ചിന്തയാലുന്നതം നിന് സ്മരണയും
അര്ക്ക ചന്ദ്രാതിയൊക്കെയും നിന്പ്രഭാപൂര നിര്ഭരം
നിര്മ്മലാനന്ദ സ്നേഹമൊക്കെയും നിര്മ്മമത നിറഞ്ഞതാം
നമ്മിലാകവേ പൂത്തുനില്പൂ വിശുദ്ധി കൈക്കൊണ്ട പൂവുകള്
കാവുതോറും പറന്നു പാടി നടക്കയാണീ ചെറു പക്ഷിയും
താവകാനന്ദ മൂര്ഝയില് ഞാനുമാക്കണി കണ്ടുണര് ന്നുവോ
കേവലം മര്ത്ത്യ രൂപമെന്നതുമേവം ഞാനും മറന്നുവോ
ആത്മചൈതന്യ ധാരയിലൊരു കാല്പ്പനീക കവിതപോല്
നിത്യമാനന്ദ ചിന്തയില് മനം എന്നുമെന്നുണര്ന്നേല് ക്കുമോ
ദേഹബുദ്ധിയില് ഞാനവിടുത്തെ ദാസനായി കൃതാര്ത്ഥനായ്
ജീവഭാവത്തില് താവകാത്മാവിന് ഭാഗമായ് ഞാന് വിലോലനായ്
ആത്മഭാവേന ഞാനവിടുത്തെ സത്തയില് വിലയിക്കവേ
ഞാനും ചൈതന്യധാരയും എന്നുമേകമാം സത്തതൊന്നല്ലോ
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ