അയ്യനേ ശരണം മാമല വാസനേ ശരണം
അയ്യനേ അഭയം ശബരീ ശൈ ലമേ ലക്ഷ്യം
അകതാരിലും ദൂരെ മലമേട്ടിലും
അനിവരതം ചൊരിയുന്ന ദിവ്യ പ്രഭ
അവനിയില്‍ അയ്യന്റെ ചിന്മുദ്ര സാക്ഷിയായ്‌
അടിയനുമാ പ്രഭയില്‍ ഒരുകിരണം
അയ്യപ്പ തൃപ്പാദ പത്മത്തില്‍ ഒരു പൂ ദളം
മലയില്‍ മകരജ്യോതി പരത്തും ആനന്ദപ്പൊരുളേ
മനസ്സില്‍ പ്രേമപ്പൊരുളു നിറയ്ക്കും അദ്വൈതപ്പൊരുളേ
മകരജ്യോതിതന്‍ മഹിമയ്ക്കു മാറ്റേകി
മനതാരില്‍ തെളിയുന്നു നെയ്‌വിളക്ക്‌
തിരുസന്നിധാനത്തില്‍ കര്‍പ്പൂരാഴിപോല്‍
ഹൃദയത്തിലാളുന്നു ചില്‍ പ്രകാശം
പരമ പവിത്രമാ ജ്യോതിസ്വരൂപത്തില്‍
നിറയുന്നതും പ്രണവ പൊരുളല്ലോ
പതിനെട്ടു കെട്ടേറ്റിയ ഗുരുസ്വാമിയിലും
ശരക്കോലേന്തിയ കന്നിയിലും
അയ്യനെ വലംവയ്ക്കും കൃഷ്ണപ്പരുന്തിലും
അഖില ചരാചര പ്രാണനിലും
എങ്ങും വിളങ്ങുന്ന ദിവ്യ പ്രഭയില്‍ ഞാന്‍
എന്നുമൊരയ്യപ്പ ജ്യോതിയല്ലോ
പ്രണവാധാരപ്പൊരുളല്ലോ
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ