68. മാധവാ സുന്ദരാ മന മോഹനാ

മാധവാ സുന്ദരാ മന മോഹനാ

മാധവാ സുന്ദരാ മന മോഹനാ
രഞ്ജകാ മന രഞ്ജകാ മുരളീധരാ
കാളിയ മര്‍ദ്ദനാ കരുണാകരാ
നന്ദനാ യദുനന്ദനാ നന്ദലാലാ

ഗോപികാ ഗീതമോ മധുസൂദനാ...
നിനക്കായിരം ഗോപികള്‍തന്‍ മധുരോക്തിയോ
ഗോപസ്ത്രീകള്‍ തന്‍ പദ ധൂളിയോ 
നൂറു വേദാദി കര്‍മ്മാദി ശാസ്ത്രങ്ങളോ
ഏറെയിഷ്ടമെന്തെന്റെ വാസുദേവാ
നിനക്കേറെയിഷ്ടമെന്തെന്‍ മന മോഹനാ

പാവം കുചേലന്റെ കല്ലവിലോ
തുളസീ തീർത്ഥത്തിൻ നൈർമ്മല്യമോ 
ചെമ്പൈസ്വാമിതന്‍ സ്വരസാരമോ
പൂന്താനപ്പാനതന്‍ പനിനീരോ
നിനക്കായ്‌ തുടിക്കുമെന്‍ ഹൃത്താളമോ
നിറകണ്ണിലൂറുന്ന സാഫല്യമോ
ഏറെയിഷ്ടമെന്തെന്റെ വാസുദേവാ
നിനക്കേറെയിഷ്ടമെന്തെന്‍ മന മോഹനാ

67. വാതാലയേശന്റെ വാതില്‍ക്കല്‍

വാതാലയേശന്റെ വാതില്‍ക്കല്‍

വാതാലയേശന്റെ വാതില്‍ക്കല്‍ നില്‍ക്കുമ്പോള്‍
ഭവദുരിതം മറക്കും
ഞാനെന്‍ ഭവദുരിതം മറക്കും
വാകച്ചാര്‍ത്തിനെന്‍ കണ്ണനൊരുങ്ങുമ്പോള്‍
ചന്ദനഗന്ധം പരക്കും മനസ്സില്‍
നിര്‍വൃതി നീരണയും
ഉഷപ്പൂജയിലെ കണ്ണനെ കണ്ടാല്‍
മതിമറന്നുള്ളം തുടിക്കും എന്റെ
മതിമറന്നുള്ളം തുടിക്കും
വാതാലയേശന്റെ

കാനനഛായയും കാര്‍മുകിലും എന്നില്‍
കണ്ണന്റെ രൂപമാവും
മാനസമന്ദിരമാതിരരാവുപോല്‍
സാദരമണിഞ്ഞൊരുങ്ങും
ഞാനൊരു ഗോപികയായ്‌ ചമയും
 തിരുനട വൃന്ദാവനമാവും
വാതാലയേശന്റെ

കാടിന്റെ രോമാഞ്ചമെല്ലാമണിയുന്ന
പൂക്കടമ്പിന്‍ ചോട്ടില്‍
കണ്ണന്റെ കന്നായി മാറിയെന്നാലോ
കോലക്കുഴല്‍ കേള്‍ക്കാം
അമൃതുപോല്‍ നല്‍നറും പാല്‍ ചുരത്താം
ഭക്തര്‍ തന്‍ ജന്മസാഫല്യമാകുന്നൊരീ
നടയില്‍ വന്നൊന്നു നിന്നാല്‍
മായമൊക്കെ കളയാം മനസ്സിന്റെ
മോഹമൊക്കെത്തീര്‍ക്കാം
നാകങ്ങള്‍തോല്‍ക്കുന്ന ശ്രീഗുരുവായൂരില്‍
അഭയം തേടിയെന്നാല്‍
നടതുറക്കുമ്പോളെന്‍ കണ്ണനെ കണ്ടാല്‍
കാണാന്‍ മറ്റൊന്നുമില്ല

66. ഗുരുവായൂരില്‍ തൊഴുതു നില്‍ക്കുമ്പോള്‍

ഗുരുവായൂരില്‍ തൊഴുതു നില്‍ ക്കുമ്പോള്‍

ഗുരുവായൂരില്‍ തൊഴുതു നില്‍ ക്കുമ്പോള്‍
ജപമായി നാവില്‍ നിന്‍ സഹസ്രനാമം
ആയിരം നാമത്താല്‍ എങ്ങിനെ വാഴ്ത്തും
ശതകോടിസൂര്യപ്രഭയാണു നീ
ലീലാവിലാസങ്ങള്‍ എങ്ങിനെയറിയും
ധ്യാന സ്വരൂപമെനിക്കപ്രാപ്യം

ചന്ദനച്ചാര്‍ത്തണിഞ്ഞാ ദിവ്യരൂപമെന്നു-
ള്ളില്‍ നിറയ്ക്കാന്‍ വെമ്പല്‍ പൂണ്ടും
കേശാദി പാദമെന്‍  കണ്ണില്‍ നിറയ്ക്കാന്‍
പലവുരു തിരക്കില്‍ എത്തി നോക്കിയും
നടയ്ക്കലെത്തുമ്പോള്‍ എന്തേ കണ്ണാ
കണ്ണുകള്‍ താനെ അടഞ്ഞുപോയീ.. എന്റെ
കണ്ണുകളെന്തേ അടഞ്ഞു പോയി
ശ്രീകോവില്‍ ചുറ്റി പ്രദക്ഷിണം വെയ്ക്കുമ്പോള്‍
ആ മുഖമോര്‍മ്മയില്‍ മറഞ്ഞും പോയീ

കാണിക്കയിട്ടിടാന്‍ ഇന്നും മറന്നു ഞാന്‍
എന്നിലെ ഞാനെന്ന ഭാവം
എന്നിനിക്കാണും കണ്ണാ.. എന്നിനിയാകുമീ
കാണിക്കയാമഹം നല്‍കാന്‍
അല്ലെങ്കില്‍ കണ്ണാ എടുത്താലുമെന്നഹം
നിന്റേതുമാത്രമല്ലേ കണ്ണാ ഇതും
നിന്‍ കൃപ മാത്രമല്ലേ

65. ശ്രീ ഗുരുവായൂ പുരമതി രമണീയം

ശ്രീ ഗുരുവായൂ പുരമതി രമണീയം

ശ്രീ ഗുരുവായൂ പുരമതി രമണീയം
ഭൂലോകവൈകുണ്ഠം ശ്രീകൃഷ്ണ സാന്നിദ്ധ്യം
ഭക്തപരായണം നാരായണനാമം
നിത്യം മുഴങ്ങും ഗേഹമിതതിപുണ്യം

തംബുരു ശ്രുതിയൊത്ത സ്വരമൊന്നിടറിയപ്പോള്‍
തുമ്പമകറ്റി ചെമ്പയ്ക്കു സ്വരമായി
ഏകാദശീ പുണ്യ സാന്നിദ്ധ്യമായിന്നും
ചെമ്പൈസംഗീത സദിരുമിന്നതി പുണ്യം

അദ്വൈതസാരസര്‍വ്വം ജ്ഞാനപ്പാനയായി
പൂന്താനഭക്തിയേവം മുക്തിനിദാനമായി
ഭക്തി വിഭക്തി സര്‍വ്വം നര നാരായണീയം
വന്ദിത ചരണയുഗം അതിരുചിരാഭലോലം

ചന്ദന ചര്‍ച്ചിതം രൂപമതിമംഗളം
തുളസീദള പരിവേഷിതം അംഗോപാംഗം
പുഞ്ചിരി കളിയാടും കൃഷ്ണശില മോഹനം
കൃഷ്ണനാമം മുഴങ്ങും നഭസ്സുമിന്നഭിരാമം

64. പാഹി ജഗജ്ജനനി..

പാഹി ജഗജ്ജനനി..

 പാഹി ജഗജ്ജനനി.. അമ്മേ
പാഹി ജഗജ്ജനനി
പരമാനന്ദ ദായിനി നാരായണി
അക്ഷര മാലയാല്‍ കോര്‍ത്തിടാം
ഞാനെന്റെ അശ്രുകണമാകും
അക്ഷതനൈവേദ്യം

വിദ്യാവിശേഷ ബുദ്ധിപ്രദായനി
വീണാപ്രവീണ വാദ്യവിനോദിനി
നിഗമാഗമ സൂത്ര സവിശേഷമലംകൃത
സുകൃതാദികാരിണി കാലാതിവര്‍ത്തിനീ

വാസന്ത പഞ്ചമി നാളിലുമെന്നുമെന്നും
സാരസ്വതമന്ത്ര ആരതിയായ്‌ മനം
അന്തരമന്തരേ അക്ഷരമെന്നിലെ
അക്ഷരാതീതപ്പൊരുളായരുളണേ
ചിത്തത്തിലാ ദിവ്യ പ്രഭയാം ഭാസുര
ദീപ്തിയതെല്ലാം വിദ്യയായ്‌ തെളിയണേ

63. വില്വ പത്രങ്ങളാല്‍ വിണ്ണവര്‍ പൂജിക്കും

വില്വ പത്രങ്ങളാല്‍ വിണ്ണവര്‍ പൂജിക്കും

ഓം നമഃ ശിവായ...
വില്വ പത്രങ്ങളാല്‍ വിണ്ണവര്‍ പൂജിക്കും
വില്വാദ്രി നാഥാ പ്രണാമം
കാമാരിയെങ്കിലും മാതാ മഹേശ്വരിതന്‍
മഹിമയെഴും നാഥാ വന്ദനം
സാഷ്ടാംഗ ദണ്ഡ നമസ്കാരം

കാളിക്കു ദാസനാം കവി പണ്ടു പാടീ
പാര്‍വ്വതീ പ: രമേശ്വരൌ
പാര്‍വ്വതീപരമേശ നാമങ്ങള്‍ക്കുള്ളിലും
ലക്ഷ്മീ സമേതം വൈകുണ്ഠ നാഥന്‍
ആദി ഗുരുവായ ശങ്കരനും തേടി
ശങ്കര നാരായണ സദ്‌ ദര്‍ശനം
വില്വ പത്രങ്ങളും തുളസിക്കതിരും
ശ്രീലകമുള്ളിലലങ്കാരം.. അവിടെ
ശങ്കര നാരായണ സത്യ ദര്‍ശനം

അര്‍ദ്ധനാരീശ്വര നിന്നുടല്‍ പാതിയില്‍
സര്‍വ്വചരാചര പ്രാണന്‍
പ്രകൃതിയും മായയും ഒരു മറവാക്കി നിന്‍
നടരാജ നടനം തുടരുമ്പോള്‍
താണ്ഡവ നൃത്തത്തിന്‍ താളക്രമമാണീ

അണ്ഡകടാഹത്തിന്‍ ഹൃദ്‌ സ്പന്ദനം

62 മനസാ സ്മരാമി

മനസാ സ്മരാമി

കരാരവിന്ദേന പദാരവിന്ദം
മുഖാരവിന്ദേ വിനിവേശയന്തം
വടസ്യ പത്രസ്യ പുടേ ശയാനം
ബാലം മുകുന്ദം മനസാ സ്മരാമി
ബാലം മുകുന്ദം ശിരസാ നമാമി

മനസാ സ്മരാമി സദാ മുഖാരവിന്ദം
മുകുന്ദ മുഖാരവിന്ദം
ശിരസാ നമാമി മുദാ പാദാരവിന്ദം
യദു നന്ദന പാദാരവിന്ദം
ഭജരേ യദു നന്ദകുമാരം...

നിഗമാഗമ സാരാമൃത ഗേഹം
ചിത്തവിലാസം ചിന്മയ രൂപം
മായാ മാനവ രൂപധാരിണം
നിത്യ നിരാമയ നിര്‍ഗുണ ഭാവം
ഭജരേ യദു നന്ദകുമാരം...

ഏതെന്‍ സഗുണാരാധക ദേവം
അവ്യയമഭയം ഗോപകുമാരം
നിത്യ വിരാജിത മമ മനവാസം
വ്യാധിത്രയ ദൂരീകൃത സുകൃതം
ഭജരേ യദു നന്ദകുമാരം...

സര്‍വ്വാലംകൃത പീത ധാരിണം
വംശിവാദകം മാനസ ചോരം
നവനീതാമൃത ഗന്ധ പൂരിതം
ശ്രീ ഗുരുവായുര്‍പുര വിലാസിതം
ഭജരേ യദു നന്ദകുമാരം....